6374 442 6437 cwearc@cwearc.org

Pakauna

Daytos a komiks ket naglaon kadagiti istorya ken kapadasan dagiti nainsigudan a babbaie iti rehiyon Cordillera maipanggep iti Conditional Cash Transfer (CCT), wenno popular iti termino a 4Ps (Pantawid Pamilyang Pilipino Program), a kangrunaan nga ipagpagna ti Department of Social Welfare and Development (DSWD). Nagrugi ti badyet na daytoy iti P4 milyon idi 2007 para iti 6,000 a benepisyaryo.

Daytoy ti kangrunaan a programa nga ipanpannakil ti dua a nagsaruno nga administrasyon (Gloria Macapagal Arroyo ken Benigno Aquino III), a mangrisut kanu ti kinakurapay dagiti umili a Pilipino. Ti kangrunaan a pokus ti 4Ps ket para iti edukasyon ken salun-at dagiti pamilya a napili.

Ti 4Ps ket inadaptar ti Pilipinas babaen iti duron ti World Bank (WB) ken Asian Development Bank (ADB) a kangrunaan a naggapuan ti pondo. Immuna a naipadas daytoy a programa idiay Latin American ken Africa sakbay nga inadaptar dagiti gobyerno iti Asia, mairaman ti Pilipinas. Sigun iti panagadal iti kapadasan ti Latin America ken Africa, maysa daytoy a dole-out; programa a nangiyaw-awan kadagiti pudno a pangkasapulan ti umili a nabayag nga inlablaban da kas iti pudno a reporma iti daga ken agrikultura, natalged a pagtrabahoan, ken naan-anay a sweldo.

Daytoy a komiks ket nakabasar kadagiti istorya manipud kadagiti workshops ken focused grouped discussion kadagiti babbai idiay Kalinga, Apayao, Montanyosa, Abra ken Baguio manipud idi 2012. Ti inisyal a report, “The Conditional Cash Transfer (CCT) in the Cordillera from the Perspective of Indigenous Women” ket naipresentar idi naisayangkat ti Cordillera Development Conference idi Nobyembre 2013. Ti Proceedings ti komperensya ket naiparuar. Napabaknang ti inisyal a report babaen iti nagtultuloy a dokumentasyon kadagiti kapadasan dagiti benepisyaryo ken saan a benepisyaryo iti 4Ps.